｛ 我會自己做系列 ｝BRUSH YOUR TEETH

好耐無UPDATE過波哥進度

但每日都發生大大小小唔同嘅事

對於BALLMAMA黎講要紀錄絕對係非常難嘅事

偶然想記低，但轉個頭好快連想記低嘅念頭都忘記得一乾二淨

呢種絕對係媽媽版老人痴呆......

波哥一直以黎都叫做願意去刷牙

不過漸漸長大後

開始扭扭擰擰

要又嚇（蛀牙蟲會起屋）又哄 搞一大輪先可以完成

趁住早幾星期學校有刷牙活動

（小朋友帶牙刷漱口杯返學學刷牙）

波家亦實行我地第一個獎勵計劃

＊＊＊儲牙仔＊＊＊

只要每日朝早同夜晚乖乖刷牙就每次可以得到牙仔一隻

儲齊10隻就可以得到佢最愛零食

第一日進行時好合作下

因為覺得牙仔好新奇

但就唔係話好明個獎勵計劃點玩

 

仲拎埋牙刷出去幫牙仔刷......

過左幾日

老師教完刷牙後

呢個小朋友簡直上左身咁

返屋企仲教返我轉頭

BALL GOR： 媽媽，老師話要刷脷仔嫁，咁樣呀！！

（確實，我地都無教波哥刷脷，老師好野！！！）

有版有眼波哥～～

之後學校仲派左紀錄手冊同DVD俾我地

波哥上左腦

日日都話要睇刷牙DVD......

除左會教刷牙，仲提小朋友要叫爸爸媽媽補刷

而家波哥刷完會叫我地

“請你幫我補刷牙呀！！！”

（好孩子口吻～～hahaha 波媽終於體會到洗腦式教育）

有次我趁波哥食早餐時話去吹頭

佢竟然好老積咁話 “你記得要刷牙呀......"

提返我轉頭咁話......@.@

喺波哥不斷努力下

終於都儲齊10隻牙仔

可以換零食啦！！

你睇佢幾開心

仲V曬

KAKAKAKA

話咁快我地已經成功儲左3round 牙仔

中間從未間斷過

成績理想

只係一粒魚仔餅

但波哥個浮誇樣呢......

努力得返黎果然唔同D

其實佢唔完全掛住食

但就好期待得到每一隻牙仔

有時唔記得左俾佢

佢會一副可憐樣

媽媽......你未俾牙仔我呀......

一次好好嘅家校合作嘅經驗

喺一連串攻勢下波哥應該可以KEEP住牙仔清潔無蛀牙呱！！

老師教刷牙＞＞＞媽媽講刷牙繪本＞＞＞儲牙仔獎勵計劃

＞＞＞刷牙DVD＞＞＞護齒紀錄（每星期交返學校）

波哥仲有首刷牙歌

等我聽日問下佢先～～

向上刷，向下刷，天天都要刷一刷

♩♬♪♫♩♬♪♫♩♬♪♫
向下刷，向上刷，牙齒清潔哈哈笑
～～哈哈哈哈哈哈～～
♩♬♪♫♩♬♪♫♩♬♪♫