LITTLEBALL成長日誌 ﹣ 31M（20.4.2015）

失職的媽媽

已經有好一段時間無再update波哥成長日誌

呢幾日驚嘆緊波哥大得太快同時

亦同時的起心肝要記低波哥的生活點滴

身高體重記錄

由於一直覺得波哥無咩高過

所以Ballmama已經好少刻意去為佢度高磅重

咁啱呢個月學校有做

順便記錄一下

31m - 13.3kg / 87cm

（一睇到87cm，有咁高咩？？ 

明明上年嘅所有衫褲今年仲著緊）

同一般小男孩唔一樣

波哥唔係一個車迷

對車不至於無興趣

但只會玩一陣就走

諗住佢去到豬脾到成日捕住係人地個停車場度

就買過TOMICA車場過佢

有次經過諗住俾佢揀一架車仔帶走

點知佢唔揀車，反而係帶走左一架直升機

Ballmama都真係無佢咁好氣......

唔愛車車嘅波哥平時玩咩多？？

咪就係佢嘅煮飯仔囉

日日都要玩

仲要返學前玩，放學玩，食完飯再玩

充滿幻想力嘅小朋友

特登整到個蘿蔔咁

之後話我知，呢個係雪人

～～哦～～

 

某程度上Ballmama都要負上責任

因為眼見波哥好愛煮飯仔

我就努力買啦當然

（如果佢係女仔，我相信我會更恨！！）

波哥最近新寵

每晚唔玩唔安樂 

咁日式玩具

當然有造型！！HAHA

飲食方面

隨住波哥越黎越大

呢方而就越黎越差

成日唔願自己食

搞搞震

慢吞吞

Ballmama每日都要花時間同佢搏鬥

有試過由佢

但唔夠恨心

見佢身形落後其他同齡小朋友

Ballmama總係有D唔忍心

轉頭又努力谷肥佢

唉！！ 真係天下母親皆一樣......

波哥鍾意包包

Ballmama最近整多左

想佢食多D

有時都唔知佢係無胃心定食到悶

每隔一排又出動下絕招

佢最愛的薯餅

衰仔，又真係食到好滋味～

即係嫌我平時D餸啦！！！

不過波媽都覺得努力無完全白費

高左嘅波哥

依然好好肉地

真係想放棄都唔得

說話方面

已經能夠用完整句子表達到心中所想

有時仲會語出驚人

（sorry，Ballmama見得大場面少......haha)

試過夜晚10點幾

當時波哥已經刷左牙但又想食餅

Ballpapa竟然真係俾......

我見到當然兩個都有話啦

點知第二日波哥瞓醒就話

爸爸好曳呀！尋晚俾餅餅曳恒食，媽媽嬲！！

爸爸曳，曳恒乖......

（有時都覺得PAPA好慘，成日俾波哥出賣......)

得閒又會TUM死人咁喺度數

鍾意爸爸，鍾意媽媽，鍾意婆婆，鍾意EE，鍾意表哥etc

下面緊接住有數百人

基本上識得都榜上有名

同時

波哥亦係一個熱愛唱歌小朋友

只要一開始同佢唱

佢係可以同你唱唔完

仲有D要求

每日嘅是日精選都唔同

暫時歌曲有：

Bla Bla Black Sheep

Twinkle Twinkle Little Star

The Wheel On The Bus

One little finger

Do you like???

ABC song

Ten Little Indians

有太多太多，諗到再寫～～

(不過，唱唱下熟左後，會改歌詞囉!!)

L.O.V.E.

上次Sports Day跟住老師唱

好enjoy嘅小朋友

（嗚嗚！ Ballmama仲未寫Sports Day……)

學習  / 校園生活

一直都係波哥最愛

無聽過佢話唔返學

反而係每朝叫我帶佢去

話好掛住MISS H.

以前成日要人幫佢拎書包

而家返學就搶住要自己揹

不過大大下嘅波哥都有曳野

事原之前MISS S. 會幫波哥換鞋

但大大下，就開始叫波哥自己換

懶精當然成日耍賴

話唔識著唔到幾百個理由

老師當然無上當

波哥就話俾Ballmama聽

唔鍾意MISS S.

Ballmama問點解

佢就話自己唔著鞋，老師唔俾佢入課室玩車車

Ballmama當然乘機話下佢

再利誘佢自己著啦

而家自己著到LU～～

今個月學校派左一人一花

波哥就開始左佢每日工作

 希望盤花撐得住

（Ballmama其實都係一名殺手......)

唔經唔覺波哥返學已經半年有多

有佢自己同學朋友

下年唔再喺呢度繼續讀

Ballmama都開心有唔捨得～～

唔捨得班好好老師

唔捨得班同學仔

唔捨得每日親自接送

自理能力

波哥唔算有咩大變化

戒片行動 未正式開始

因為波哥有倒退現象

之前仲識得話自己去POO POO

點知而家大左POO POO都唔出聲

有時問佢就話自己無

其實痾左嫁啦，不過呢個小朋友太貪玩

以為話自己無就可以繼續玩

WEE WEE

其實某程度上波哥已經ready嫁啦

如果 帶佢去洗手間

佢係可以企去自己個尿兜度去

只係唔會主動

明知唔急得

Ballmama希望暑假一TICK過

可以全日貼身幫佢戒

唔想戒到唔拖唔水咁

希望趕得切K1開學前搞掂

另一方面

波哥喺除衫著鞋方面有小進步

呢樣多得學校老師同EE

唔係老師堅持

波哥仍然在耍賴扮細個

其實佢某程度上似足Ballmama

唔願長大呢！！

每日放學

Ballmama會要求波哥自己除鞋除襪

放好自己對鞋

除校服 （鈕當然要Ballmama幫手）

最後將污糟衫放去洗衣籃

習慣嘅野日子有功下

波哥都輕易做到

不過當我唔喺身邊

呢個小朋友就作怪

事事拖慢去做

想其他人幫佢做埋

古惑仔一名

每月怪現象

波哥嘅terrible2情況唔算嚴重

正當我以為完結時

波哥開啟左自己保護程式

對任何以為入侵/騷擾一律反抗

事例一

去朋友屋企

一大班小朋友一齊玩玩具

每當有小朋友想拎佢玩具玩

只係想，人地都未出手

佢就先發制人，出手打人推人

打人呢個行為一度令波媽好頭痛

成日提佢唔好打人

不過佢完全好似聽唔到

突然有一日

波媽從另一角度睇返

先發現到問題原來唔喺打人度

而在於玩具

波媽發現到之後

就拎返隻巧虎（一齊玩）出黎

不停日哦波哥夜哦波哥可以同其實小朋友一齊玩

如果有小朋友想要佢嘅玩具

就同小朋友講

“唔緊要，一齊玩呀”

（巧虎TONE）

巧虎真係威力無窮

波哥暫時打人情況得到改善

不過間中唔如意時

就會打下媽媽

Ballmama要繼續下苦功先得！！

今個月分享住咁多先

希望下次成長日誌唔會係3歲啦！！