波家小工程 ﹣ HORACE‘s Little World

由於波家之前兩間細房一直都無整過

由波哥出世一直講話要裝修

講下講下已經有3年

眼見波哥大啦

就快上K1

加上對 “我” 概念越黎越重

想訓練佢自己瞓返同時

亦想俾返個小天地波哥

（由一歲起，波哥就跟住 BALLMAMA & BALLPAPA 瞓）

今年趁暑假就的起心肝整好佢

前期執拾工作一D都唔簡單

因為原先兩間房放左唔少雜物

唯一嘅解決方法係掉

將D長期不見天日嘅野盡掉！！

但住緊嘅同時要整

確實係又煩又污糟

所以工程開始期間

我同波哥都逃到公公婆婆到

得返波爸留守

好彩嘅係

順利十日內就完成

（我地係拆野，批灰，油牆啫）

波媽同波哥回歸後就一直忙住裝野

收貨同拆箱

以龜速遂步完成

終於可以抖一抖

完成圖

以白色為主, 增加空間感

波哥間房係我地全屋最光猛嘅地方

買燈時考慮到如果第時再買風扇好阻地方

最後決定二合一

用後感：比一般風扇範圍更廣

好舒服好似自然風咁

大大減少左開冷氣機會

Ballmama好耐好耐之前已經睇中左呢類TENT

只係苦無藉口買入

我將波哥嘅廚房放左入去

果然一如我所料

波哥對於佢自己呢間屋充滿好奇

（佢成日話個TENT係佢間屋）

成日走出走入

玩煮飯仔

UM…...個PANDA FOOTBALL……

唔可以煮嫁 -.-"

房內好多擺設係以前整落

終於可以整整齊齊放埋佢地一齊啦！！！

波哥同波媽都好鍾意呢個GUITAR

多謝融融媽～～

 波哥真係成日拎住喺自己小天地玩唔停

波哥實在太多野啦！！

一個掛架絕對唔少得

即刻整齊曬

以後唔使亂放

不過就要媽媽幫手

無法，房間太細，空間有限

 波哥呢個咕咕鐘一見傾心

波媽唯有忍痛買左

因為當日波哥望住佢

一邊做動作一邊 咕咕，咕咕咁叫

其實媽媽都好鍾意嫁～

 其實整咁多野都係想波哥鍾意間房

從而唔抗拒自己喺房瞓

上年BALLMAMA就曾經試過要波哥自己瞓返BB床

唔使兩日就投降

因為敵不過波哥嘅喊聲

同時亦覺得可以攬住佢瞓日子唔多

原以為今次都要用一段時間佢先肯自己瞓

點知，佢一見到自己間房已經好開心

不過話間房係自己

完全唔抗拒自己房瞓

當然我地都會陪佢瞓一陣先走

暫時係成功嫁！！

 當然偶然朝早會逃走

發現佢瞓左喺我地床

（暫時試過兩次）

我地估佢半夜醒左驚就走過黎

我地亦唔介意

話俾波哥聽爸爸媽媽房隨時歡迎佢

反正大大下佢應該唔會再走過黎同我地一齊瞓

諗到呢到，又開始唔捨得......

除左波哥間房

我地都一次過整埋雜物房

基本上，雜物波哥佔一半以上

實在太太太誇張

將所有野放曬入右手邊大櫃度

而BALLPAPA亦可以有返少少私人空間

愛子心切嘅BALLMAMA仍然死心不息

不停搵位放波哥嘅野

入手大畫架俾佢

等波哥可以不停亂畫

整整下又搞左成個幾月

BALLMAMA係時候為另一個PROJECT努力啦！！